शिक्रापूर, पुणे : पुण्यात अपघाताच्या घटना दिवसेंदिवस वाढत असून यात भर पडताना दिसत आहे. त्यातच शिरूर तालुक्यातील शिक्रापूर येथून धक्कादायक घटना समोर आली आहे. आपल्या मुलांना शाळेला घेऊन निघालेल्या दुचाकीला एका ट्रकने चिरडल्याची घटना समोर आली आहे. या घटनेत बापांसह दोन चिमुकल्यांचा दुर्दैवी अंत झाला आहे.
गणेश खेडकर, तन्मय खेडकर आणि शिवम खेडकर अशी अपघातात मृत्युमुखी पडलेल्या तिघांची नावं आहेत. आज सोमवारी सकाळच्या सुमारास हा अपघात झाला आहे. शिक्रापूर – चाकण महामार्गावर अपघात झाला असून याप्रकरणी शिक्रापूर पोलिसांनी ट्रक चालकाला ताब्यात घेतले आहे.
याबाबत पोलिसांनी दिलेली माहीती अशी की, शिक्रापूर – चाकण महामार्गावर सकाळी खेडकर हे आपल्या दोन चिमुकल्याना घेऊन शाळेत सोडवण्यासाठी निघाले होते. त्याचवेळी पशु खाद्य वाहून नेणाऱ्या भरधाव ट्रकने त्यांच्या दुचाकीला धडक दिली. यामध्ये ट्रकने तिघांनाही चिरडले. शाळेमध्ये पोहचण्यापूर्वीच दोन मुलांना आपला जीव गमवावा लागला आहे. या अपघातानंतर नागरिक चांगलेच संतप्त झाले आहेत. शिक्रापूर पोलिसांनी ट्रक चालकाला ताब्यात घेत पुढील तपास सुरू केला आहे. सध्या याप्रकरणी ट्रक चालकाविरोधात गुन्हा दाखल करण्याची प्रक्रिया सुरू आहे.